Að mótmæla með lögbroti ?

Ég var á ferð í Herðurbreiðarlindum ásamt hópi fólks í síðustu viku, og gistum við þar tvær nætur í tjöldum frá þriðjudegi til fimmtudags. Aðbúnaður allur til fyrirmyndar og móttökur land- og skálavarða góður.

Við brottför á fimmtudagsmorgun blasti við okkur fáni í hálfa stöng við Þorsteinsskála. Okkur brá nú við, hvort einhver þjóðþekktur væri fallinn frá eða hvort einhver hefði látist á staðnum um nóttina.

Við spurðum landverðina um þetta við brottför en svarið var stutt og laggott, "við erum að mótmæla stóriðjunni". Við bentum landvörðum vinsamlegast á að þeir væru að brjóta fánalög og þeir sögðu "að þeim væri alveg sama". Jafnframt mótmæltum við því að fánastöng og fáni Ferðafélags Akureyrar (FFA) væri notaður með þessum hætti.

Við í þessum hóp (nokkur í FFA og nokkur í FÍ) höfum misjafnar skoðanir á stóriðjustefnum og virkjunum. En við vorum öll sammála um að þetta væri röng leið, þessir aðilar sem hafa það hlutverk að fá fólk til að framfylgja lögum og reglum ættu ekki sjálfir að brjóta lög með mótmælum sínum. Til þess væru aðrar leiðir.

Hræddur er ég um að þessir sömu landverðir yrðu fúlir ef þeir sem keyra utan vega eða henda rusli myndu svara "okkur er alveg sama" þegar þeim væri bent á að það sé ólögegt að gera slíkt.. Ég tel að mótmælaaðferðin sem slík sé röng, án tillits til þess hvaða skoðun menn hafa á því sem verið er að mótmæla.